Grupi për Ballkan është duke mbajtur konferencën “Dialogu me Serbinë: Mësime nga e kaluara për të ardhmen e procesit”, ndërkaq në këtë konferencë po marrin pjesë edhe Ish- përfaqësuesja e Lartë e Bashkimit Evropian për Punë të Jashtme, Catherine Ashton dhe ambasadori Philip Reeker.
Baronesha Catherine Ashton në fjalimin e saj potencoi se Kosova është shumë e rëndësishme për të, ndërsa ritheksoi se procesi i dialogut Kosovë – Serbi nuk ka qenë asnjëherë i lehtë.
“Shpresoj ta kuptoni se koha e kaluar në dialog ka qenë e vështirë. E ardhmja e këtij rajoni është në Bashkimin Evropian, është më mirë për ekonominë, për zhvillimin e të rinjve, etj”, theksoi ajo.
Ish-përfaqësuesja e Lartë e Bashkimit Evropian për Punë të Jashtme, Catherine Ashton theksoi se do ta mbështesin dialogun dhe se duan përparim në këtë proces, porse sipas saj, rruga më e mirë që Kosova të ecë para gjithmonë do të marrë kohë, gjithmonë do të jetë e vështirë.
“Ne duam të shohim përparimin e dialogut. Nuk do të jetë e lehtë, por shpresoj se do ta bëjmë. Dhe do të mbështeteni në këtë proces nga shumë njerëz që duan të shohin suksesin e Kosovës”, tha mes tjerash ajo.
Ashton po ashtu deklaroi se për procesin e dialogut duhet të merr njohje edhe Miroslav Lajçak, pasi sipas saj, ai e meriton një gjë të tillë duke theksuar se Lajçak beson në të ardhmen e Kosovës.
Një ditë më parë kryeministri Albin Kurti ka thënë se Lajçaku dhe shefi i Bashkimit Evropian për Politikë të Jashtme dhe të Sigurisë, Joseph Borrell kanë rënë në kushtëzimet e presidentit të Serbisë Aleksandar Vuçiq. Sipas tij kushtëzimi i Serbisë me Asociacionin e komunave me shumicë serbe tashmë është shndërruar në qëndrime të emisarëve Borrell dhe Lajçak.
