Shahadije Bikliqi, asambliste e Lëvizjes Vetëvendosje në Lipjan, deklaroi se ka dorëzuar kallëzim penal kundër kryetarit të komunës, Imri Ahmeti, pasi sipas saj, ai ia ka dëmtuar integritetin.
Bikliqi tha të hënën në KTV se më 27 shtator në Kuvendin Komunal, Ahmeti e ka pranuar se nuk ka lejuar që ajo të punësohet në komunë si zyrtare për informim.
“Të enjten e kaluar kam dorëzuar kallëzim penal në Prokurorinë Themelore në Prishtinë për kryetarin e komunës, Imri Ahmeti. Si rrjedhojë e deklarimit të tij publik në seancën e 27 shtatori në Kuvendin Komunal në foltoren e Kuvendit, ku e ka pranuar se e ka penguar punësimin tim si zyrtare për informim, që kam aplikuar vite më parë”, deklaroi ajo.
Sipas asamblistes së VV-së, kryetari Ahmeti ka ndërhyrë edhe në konkurse të tjera publike.
“Ka qenë deklaratë skandaloze, e ka pranuar se si në të kaluarën edhe tash, ka vendosur se kush mund të aplikojë e kush jo. Kryetari e ka shkelur Ligjin për qeverisje lokale. Ka ndërhyrë në konkurse publike dhe më këtë ka treguar se është përgjegjës dhe ka ndërhyrë si për punësime në sektorin e shëndetësisë, të arsimit dhe të administratës”, tha ajo.
Bikliqi u shpreh se ndaj kryetarit ka dorëzuar edhe padi civile pasi sipas saj, Ahmeti e ka ofenduar dhe sharë atë.
“Padia civile ka të bëjë edhe me fyerjet që m’i ka bërë kryetari, ka shpifur, e ka shprehur injorancën dhe tendencën që e ka që sillet si zot shtëpie. Kjo ka qenë një gjë e papranueshme, për çka kam bërë edhe padi civile. Është e papranueshme një sjellje e tij”.
