Në fushatën zgjedhore të zgjedhjeve të tetorit të vitit 2021, Partia Demokratike e Kosovës, kandidati i saj për kryetar të Komunës së Prizrenit, Shaqir Totaj dhe eksponentë të lartë të kësaj partie, kishin premtuar që nëse vijnë në pushtet do të ndërtonin në Has një stadium të përmasave të UEFA-s të quajtur “Has Arena” të ‘Valaku’ Kabash e Has e për ndërtimin e së cilës ishin paraparë të ndaheshin 3 milionë euro në kornizën afatmesme buxhetore të vitit 2023-2025.
Lidhur me këtë, asamblisti i Lëvizjes Vetëvendosje në Komunën e Prizrenit, Selman Sokoli përmes një video të postuar në Facebook, ka denoncuar keqpërdorimet dhe premtimet boshe të PDK-së në këtë komunë duke thënë se shuma prej 3 milionë eurosh për ndërtimin e atij stadiumi ishte reduktuar në vetëm 700 mijë dhe në fund në buxhetin e miratuar më datën 14 të këtij muaji për këtë projekt nuk është paraparë asnjë mjet financiar.
Sokoli tutje thotë se pas fjalës së tij në seancën e miratimit të buxhetit për vitin 2024, 2025 dhe 2026 janë lajmëruar qytetarë të ndryshem nga rajoni i Hasit, Gjakovës dhe Prizrenit të cilët kanë pretenduar që eksponentë të PDK-së në emër të ndërtimit të këtij stadiumi i kanë marrë mjetet financiare, gjë që është shkelje ligjore.
Pas publikimit të videos së Sokolit, një qytetar ia ka shpërndarë postimin dhe në mbishkrim theksoi se në emër të stadiumit e kanë mashtruar dhe ia kanë marrë 500 euro. /KosovaNews
