Dhjetëra serbë nuk kanë shkuar asnjë ditë në punë, por rrogën e ka marrë rregullisht dhe atë për vite të tëra. Por, kjo praktikë është ndërprerë vetëm pas gjashtë vjetësh, në shkurt të këtij viti, kur Ministria e Arsimit nuk ia ka ndarë rrogën dhe tani serbët janë detyruar t’i kthehen punës.
Ministrja e Arsimit, Arbërie Nagavci, ka thënë se 32 serbët që për vite me radhë janë paguar pa punuar, i janë rikthyer punës.
Kjo, sipas Nagavcit, ka ndodhur pasi që ajo, kur e kishte marrë mandatin kishte kërkuar që të largoheshin nga listat.
“Në momentin që e kam marr detyrën kam konstatuar që janë 32 zyrtarë serbë që nuk iu dihet as kontakti. Që nga viti 2015 deri 2021 janë paguar pa asnjë analizë. Unë iu kam kërkuar që të hiqen nga listat, pas kësaj këta janë lajmëruar dhe kanë thënë që është dashur t’u ofrohen kushtet për punë dhe se asnjëherë nuk janë kontaktuar nga askush. Si ministri jemi siguruar që t’iu kërkojmë punë dhe llogari. Këtë zyrtarë i kryejnë punët dhe japin llogari çdo muaj. Konsideroj që kemi bërë një punë shumë të mirë”, ka thënë Nagavci, në Komisioni për Mbikëqyrjen e Financave Publike, ku është shqyrtuar Raporti i Auditimit për pasqyrat vjetore financiare të MAShTI-t, për vitin 2021.
Këtë Nagavci e ka thënë pasi që deputetja e LDK-së, Hykmete Bajrami, ka kritikuar ministren për pagesë të këtyre zyrtarëve.
“Keni thënë se do t’i hiqni nga pagesat mësimdhënësit, e tani keni bërë marrëveshje. Po duket që tradita po vazhdon. Zyra Kombëtare thotë që pas dy muajve janë paguar këta zyrtarë”, është shprehur Bajrami.
Nagavci ka theksuar se kanë bërë perfomancë të mirë dhe kanë realizuar shumë rekomandime që ZKA-ja ka dhënë.
Kujtojmë se gjithçka ka ndryshuar muajin shkurt të këtij viti, kur Ministria e Arsimit, Shkencës, Teknologjisë dhe Inovacionit (MASHTI) në Kosovë nuk i ka ekzekutuar pagat për këta punëtorë./KosovaNews/
