Kryeministri i vendit, Albin Kurti, sot ka vizituar shkollën Fillore të Mesme të Ulët “Elena Gjika”, vizitë kjo e cila është bërë me rastin e shënimit të përvjetorit të mësimit në gjuhën turke.
Kurti në fillim të fjalimit, i ka përshëndetur pjesëmarrësit me fjalën turke “günaydin” (që në shqip do të thotë – mirëmëngjesi).
Në këtë rast kryeministri ka premtuar mbështetje për studentët që mësojnë gjuhë të huaja në Kosovë.
“Sot bëhen 72 vjet, prej se qytetarët e Kosovës patën mundësinë që të mësojnë edhe në gjuhën turke. Jemi krenarë për këtë traditë kaq të gjatë të shumëgjuhësisë në vendin tonë dhe për mundësinë që fëmijët në Kosovë të mësojnë në gjuhën e tyre amtare. Ne planifikojmë që të organizojmë aktivitete për mësimin për komunitetet me materiale mësimore dhe të tjera të cilët paraqesin domosdoshmëri për mbështetje profesionale për shkollat ku ofrohen këto mundësi edhe në gjuhën shqipe. Ne gjithashtu do të ofrojmë kushte më të lehta për studentët që mësojnë gjuhë të huaja, sepse duhet t’i mësojmë gjuhet e njëri-tjetrit”, u shpreh Kurti.
Ai shtoi se i vjen mirë që vjet qeveria ka gjetur zgjidhje për të ofruar tekste shkollore mësimore dhe të tilla që janë cilësore e në gjuhën turke si dhe strategjia e arsimit për vitet 2022-2026, përfshin subvencione të vazhdueshme për hartimin, rishikimin, përkthimin dhe përshtatjen e teksteve mësimore dhe materialeve të tjera në gjuhën turke por edhe në gjuhët e komuniteteve të tjera joshumicë që jetojnë në Kosovë.
