Mbledhja e Komisionit për Arsim, sërish u shoqërua me përplasje të mëdha mes përfaqësuesve të institucioneve dhe atyre të Bashkimit të Sindikatave. Pas diskutimeve të gjata, në fund, zgjidhje që nxënësit të kthehen në bankat shkollore nuk u gjet.
Megjithatë, përfaqësuesit e BSPK-së u zotuan se do ta marrin në konsideratë një kërkesë të kryetarit të Komisionit, deputetit nga radhët e Vetëvendosjes, Ardian Gola.
Ky i fundit ka dhënë një propozim për Sindikatën që t’i përdorin notat si protestë sindikale (notimin e nxënësve), që fëmijët të kthehen në shkolla.
Kjo të vazhdojë, sipas Golës, derisa të gjendet një zgjidhje mes Qeverisë dhe BSPK-së. Ky propozim ka mbetur edhe të diskutohet me anëtarësinë e sindikatave.
Ndërkaq jo vetëm përplasjet brenda mbledhjes ranë në sy. Ajo që u vërejt ishte mungesa e Rraman Jasharajt.
Kush po nuk po e thotë të vërteten, Shala apo Ymeri
Por më shumë se mungesa, interesante është arsyeje pse Rrahman Jasharaj nuk ishte në mbledhjen e sotme ku u diskua për grevën. Kjo për faktin se për këtë janë dhënë çuditërisht dy versione.
Për mungesën e Jasharajt sot në mbledhje, janë dhënë dy versione dhe atë nga vetë drejtuesit e SBAShK-ut.
Në kundërthënie e me deklarata të ndryshme kanë dalë nënkryetarja Vjollca Shala dhe sekretari Ymer Ymeri.
Nënkryetarja e Sindikatës së Bashkuar për Arsim, Vjollca Shala, pas mbledhjes së Komisionit për Arsim, ku debatuan për gati tri orë me përfaqësues të Qeverisë, ka thënë se kryetari Rrahman Jasharaj nuk ishte prezent për shkak të angazhimeve të tjera.
Për debatin e zhvilluar në Komision, Shala ka thënë se do të mbajnë një diskutim edhe me këshillin grevist.
“Jasharaj është edhe kryetar i këshillit grevist të BSPK-së dhe ka pasur angazhime tjera për këtë arsye nuk ishte në takim dhe unë si nënkryetare isha e pranishme. Ne mbajmë takime të vazhdueshme me kryetar të sindikatave të nivele komunale. Sot gjithsesi ne mbajmë takim përgjigjen e marrim pasi të konsultohen kryetarët e sindikatave me anëtarësinë punëtorët e arsimit”, ka thënë ajo pas përfundimit të mbledhjes.
Por krejt diçka tjetër thotë sekretari i SBAShK-ut, Ymer Ymeri.
Në një prononcim Ymeri ka thënë se Jasharaj ka munguar për shkak të gjendjes shëndetësore.
“Nuk është diçka serioze, për shkak angazhimeve intensive ka pësuar lodhje, ai ka qenë duke përdorë terapi, thjeshtë është ftohur pak. I kemi sugjeru me pushu disa ditë”, ka thënë për gazetën Insajderi, Ymer Ymeri.
