Somen Debnath, i cili vjen nga një fshat i largët nga Kalkuta e Indisë, ka filluar udhëtimin e tij me biçikletë që nga viti 2004. Ai gjatë kësaj periudhe të gjatë kohore ka përshkuar më se 164 shtete të botës, e vendi i 165 me radhë është pikërisht Kosova.
Somen e takuam rastësisht pikërisht në sheshin “Nëna Terezë” me biçikletën e tij, duke bërë një video për ta paraqitur qëndrimin e tij në Kosovë.
Ai në një intervistë të shkurtë për KosovaNews shpalos detaje nga ky udhëtim maratonik nëpër të gjithë vendet e Botës.
“Quhem Somen Debnath vij nga India dhe udhëtoj rreth botës me biçikletë, tani jam në Prishtinë, kryeqytetin e Kosovës dhe ky është vendi i 165 të që udhëtoj rreth Botës.
Pra ky udhëtim ka filluar që nga 27 maj të viti 2004 nga një fshat i largët në Indi, i cili është 18 kilometra nga Kalkuta. Dhe siç e dini Kalkuta është vendqëndrimi i Nënës Terezë. Unë kam lindur dhe jam rritur në atë vend dhe kam udhëtuar nëpër të gjithë Indinë, Azinë, Evropën, Afrikën, Amerikën e Jugut, Antarktidën dhe jam kthyer në Evropë të udhëtoj edhe në 6 vende të tjera dhe ky është vendi i parafundit në Evropë”, thotë Somen për KosovaNews
Debnath thotë se sot është një ditë e veçantë për të dhe vendin e tij, pasi që 15 gushti është 75 vjetori i pavarësisë së Indisë nga Britania e Madhe dhe për këtë ndjehet i emocionuar që ndodhet në Kosovë.
Aventura e çiklistit nga India nuk do të ndalet me Kosovën.
Ai thotë se pas kësaj do ta vizitojë shtetin e Maltës.
Misioni i Somen është fushata e vetëdijesimit ndaj HIV-AIDS dhe qëllimi i tij është që t’i shkelë të gjitha vendet e botës me biçikletën e tij që tashmë i kanë mbetur vetëm edhe 27 shtete.
“Pas Kosovës do të vazhdojnë në Maltë dhe pastaj do të shkoj në Australi. Më kanë mbetur vetëm 27 vende në botë pa vizituar. Unë po udhëtoj në 191 vende me një mision, ky mision është në përhapjen e vetëdijesimit ndaj HIV, dhe gjithashtu të promovoj kulturën indiane.
Unë jam një ambasadorë kulture që ta prezantoj vendin tim në botë dhe sot është një ditë e veçantë sepse është 75 vjetori i pavarësisë së Indisë nga Britania. Pra është një ditë e veçantë dhe jam mirënjohës që jam në Kryeqytetin e Kosovës është një vend i mrekullueshëm dhe shpresoj se do të kaloj mirë dhe do të vazhdoj me udhëtimin tim edhe në 27 vende të tjera”, është shprehur ai./KosovaNews/
