Një aksident tragjik me pasojë vdekjeje ka ndodhur më 25 korrik 2025 në rrugën Prishtinë–Mitrovicë, ku një zyrtar policor dyshohet se ka përplasur për vdekje një 53-vjeçar.
Sipas njoftimit zyrtar nga Inspektorati Policor i Kosovës (IPK), personi i dyshuar është Bedri Ferati, pjesëtar i Policisë së Kosovës i cili në momentin e aksidentit ndodhej jashtë detyrës zyrtare dhe po qarkullonte me veturën e tij private. Viktima është identifikuar si Liman Shyti, rreth 53 vjeç, që punonte si staf civil në kuadër të Policisë së Kosovës.
IPK ka bërë të ditur se është iniciuar procedurë penale për veprën “Rrezikim i trafikut publik” dhe ndaj të dyshuarit është caktuar masa e ndalimit prej 48 orësh.
Autoritetet janë duke vazhduar hetimet për ndriçimin e plotë të rrethanave të rastit.
Shënim: Personi i përmendur në këtë rast prezumohet i pafajshëm derisa fajësia e tij të mos provohet me një vendim të formës së prerë nga gjykata.
