Një person është arrestuar të mërkurën pasdite në rrugën “Ramadan Rexhepi” në Ferizaj, pasi policia i ka gjetur një paketim letre me marihuanë.
Sipas policisë, i dyshuari është L.K 19-vjeçar.
“Me datën 03.01.2024 rreth orës 17:30 policët e stacionit në Ferizaj, gjatë patrullimit në rrugën ‘Ramadan Rexhepi’ në Ferizaj kanë ndaluar personin të dyshuar L.K (M/K) i moshës 19 vjeçar, tek i cili është gjetur një paketim letre me substancë të narkotikëve, të marihuanës”, thuhet në komunikatën për media.
Pas intervistimit nga policët hetues, me vendim të prokurorit kujdestar është bastisur shtëpia e të dyshuarit, ku është gjetur një armë zjarri (pistoletë) me 11 fishekë.
Ndërsa, në oborr janë gjetur edhe dy qese të substancës narkotike me marihuanë, me peshë gjithsej 20.80 gram, dy mulli për bluarje dhe një pako letra për mbështjellje të marihuanës.
“Me vendim të prokurorit i dyshuari është dërguar në mbajtje për 48 orë për procedura tjera hetimore”, bëhet e ditur më tej në njoftim.
