Policia e Shtetit në Shqipëri e ka arrestuar një të akuzuar në Kosovë për trafikim me njerëz, i cili është pronar i një lokali nate në Prishtinë.
Sipas Policisë, personi i arrestuar ishte në kërkim ndërkombëtar dhe do të ekstradohet në Kosovë.
“Në kuadër të megaoperacionit “Sundimi i ligjit”, si dhe si rezultat i informacioneve të siguruara nga inteligjenca policore dhe të shkëmbyera ndërmjet Interpol Tiranës dhe agjencive ligjzbatuese në Kosovë, Forca e Posaçme Operacionale dhe Seksioni kundër Trafiqeve, të DVP Durrës, kapën në lagjen nr.13 dhe vunë në pranga, me qëllim ekstradimin në Kosovë, shtetasin e shpallur në kërkim ndërkombëtar D. R., 47 vjeç, i lindur në Mirditë”, ka njoftuar Policia e Shqipërisë.
Tutje, në njoftim bëhet e ditur se Gjykata Themelore në Prishtinë ia ka caktuar masën e arrestit në burg për veprën penale “trafikim me qenie njerëzore”.
“Interpol Tirana po bashkëpunon me agjencitë ligjzbatuese në Kosovë, për të finalizuar ekstradimin e shtetasit D. R.”, thuhet në njoftim.
