Një person është arrestuar këtë të mërkurë, pasi dyshohet se ditë më parë në fshatin Doganaj të Kaçanik ishte prezantuar rrejshëm si person zyrtar.
Sipas policisë, i njëjti i veshur me rroba civile duke e mashtruar ia kishte marrë një personi 1 mijë e 600 euro, me qëllim se do t’i ndihmonte për lirimin e një personi nga burgu.
“Me datën 15.11.2023 rreth orës 14:20 policët hetues të stacionit në Kaçanik, pas një pune intensive hetimore, grumbullimit të informacioneve në terren, kanë arritur të identifikojnë dhe të arrestojnë personin S.R (M/K) i moshës 44 vjeçar , i cili dyshohet se ditë më parë në fshatin Doganaj të Kaçanikut ishte prezantuar rrejshëm si zyrtar policor me rroba civile dhe i kishte marrë (mashtruar) 1600 euro personit tjetër, me qëllim se ai do ti ndihmonte për lirimin e një personi nga burgu”, thuhet në komunikatën për media.
I dyshuari është shoqëruar në stacionin e policisë në Kaçanik dhe pas intervistimit nga policët hetues, me vendim të prokurorit kujdestar është ndaluar në mbajtje për 48 orë për procedura tjera hetimore, ndërsa rasti është cilësuar ‘Prezantim i rremë si person zyrtar’.
