Policia e Kosovës ka bërë të ditur se ka arrestuar tre persona në veri të Mitrovicës, ndërkaq njëri nga ta kishte urdhër-arrest aktiv në lidhje me një laborator droge.
Në njoftimin për media bëhet e ditur se në orët e hershme të së enjtes, saktësisht rreth orës 03:15, Policia e Kosovës, konkretisht Njësia Patrulluese e Stacionit Policor Mitrovicë-veri, gjatë angazhimeve të saj në garantimin e sigurisë dhe parandalimin e veprave penale, ka ndaluar për kontroll automjetin e tipit VW Golf, të cilën e drejtonte i dyshuari me iniciale m/s (N. M.) dhe pasagjerë në automjet ishin të dyshuarit me inicialet (M. T. dhe D. J.)
Pas ndalimit të automjetit nën dyshimin për posedim të substancave narkotike është kontrolluar automjeti dhe në të është gjetur sasi e dyshuar e kokainës dhe marihuanës.
Dëshmitë e sekuestruara janë evidentuar si në vijim: sasi e dyshuar e kokainës me peshë rreth 10 gramë, sasi e dyshuar e marihuanës me peshë 98 gramë, para (kesh) 83540 dinar të Serbisë dhe 205 euro dhe katër telefona mobilë.
Gjatë verifikimit të personave të ndaluar nga Policia e Kosovës ka rezultuar se i dyshuari me iniciale (M. T.) m/s, ka urdhër-arrest aktiv në lidhje veprën penale për narkotik/laborator droge.
Në lidhje me rastin është njoftuar prokurori kujdestar dhe me aktvendim mbi ndalim për tre personat e dyshuar është caktuar masa e ndalimit policor prej 48 orësh.
