akuza të shumta ndaj prokurorit Blerim Isufaj: AKI i dërgon fakte, ky asnjë veprim e aktakuzë për krimet në veri – Nuk e ka të fituar asnjë rast në gjykatë
Kryeministri i vendit Albin Kurti ka folur në seancën e sotme rreth rastit të arrestimit të kryeshefit të Korporatës Energjetike të Kosovës (KEK), Nagip Krasniqi.
Deklarimi i kryeministrit erdhi pasi në seancën e Kuvendit, partitë opozitare duke folur për këtë rast e sulmuan Qeverinë.
Kryeministri tha se në KEK ka pasur keqpërdorime edhe në të kaluarën, por nuk janë trajtuar nga ana e prokurorisë me kaq zell sikur në rastin e drejtorit aktual.
“Është e vërtetë që pati një gëzim opozitar për arrestimin e kryeshefit Krasniqi, mirëpo ky është fakt i opozitës, nuk është fakt i çështjes. Ne e dimë që ka pasur shumë kryeshefa në KEK, ka pasur keqpërdorime marramendëse, mirëpo asnjëherë nuk janë trajtuar nga sistemi i drejtësisë përkatësisht nga prokuroria”, tha Kurti.
Ai theksoi se me rastin e kryeshefit të KEK-ut ka pasur gëzim tek opozita.
“Është e vërtetë që dje u arrestua kryeshefi i KEK-ut Nagip Krasniqi. Ai është në ndalje për 48 orë. Është sistemi i drejtësisë që merret me çështjen e drejtësisë. Kjo çështje ka fakte e urojmë që ato të merën me profesionalizëm dhe përpikëri”, theksoi ai.
Në këtë rast kryeministri ka adresuar kritika ndaj personit që me çdo kush po tenton të merr pozitën e kryeprokurorit të shtetit, Blerim Isufaj.
Shefi i ekzekutivit tha se ekziston një disponim negativ ndaj qeverisjes aktuale dhe ndaj pushtetit të dalë nga 14 shkurti.
E Kurti tërë këtë e lidhi edhe me figurën e prokurorit Blerim Isufaj.
“Kjo lidhet më shumë se me askënd tjetër me figurën e prokurorit Blerim Isufaj. Bëhet fjalë për një prokuror që është i mirënjohur në skenën tonë publike.
Që rastin e vrasjes së ish shefit të AKP-së, Dino Hasanaj e ka kategorizuar në vetëvrasje, ndërsa rastin e vetëvrasjes së ish drejtorit të informimit në kryeministri, Hamdi Sopës e shndërroi në vrasje.
“Një prokuror që asnjë rast nuk e ka të fituar në gjykatë. Ky tenton të bëhet kryeprokuror përkundër vullnetit të presidentes, kryeparlamentarit dhe kryeministrit. Ne i kemi fituar zgjedhjet dhe me qeverisjen tonë e bëjmë alokimin e buxhetit. Por vendi më i lakmuar po duket se është pozita që bën alokimin e rasteve”, është shprehur Kurti.
Ai tha se Prokurora nganjëher s’do e nganjëhere s’di, e në shumë herë të dyja bashkë.
Kryeministri Kurti theksoi se është në dijeni se Agjencia e Kosovës për Inteligjencë (AKI) dërgon shumë dëshmi për shkeljet e shumta që janë bërë sidomos në veri të vendit, por Prokuroria nuk vepron asgjë dhe nuk kemi asnjë aktakuzë e ndjekje për këto gjëra.
“Prokurorët që vrasjen ta bëjnë vetëvrasje e vetëvrasjen ta bëjnë vrasje nuk do të mund të bëhen kryeprokuror”, ka thënë mes tjerash Kurti.
Kurti u është kundërpërgjigjur kritikave të opozitës, duke iu referuar deputetit të PDK-së, Abelard Tahiri, si deputet shurdhues, ka thënë se ai do të dëshironte që kryeshef në KEK të ishte Nijazi Thaçi.
“Unë nuk kam dilema që deputeti më shurdhues do të dëshironte që kryeshef në KEK të ishte Nijazi Thaçi, por ai është shkarkuar në qeverinë Kurti 1, aty e ka hallin. Natyrisht që nuk do të përfshihesha në debat sepse kur erdha në seancë kishte nisur seanca gjyqësore për Krasniqin andaj unë intervenova në intervenim”, ka theksuar Thaçi.
Ai ka thënë se drejtorit të KEK-ut i është bërë gjyqi në Kuvend. “Më thanë t’ia tregoj vendin Nagipit, ai është në burg si t’ia tregoj vendin. Këtu iu bë gjyqi në Kuvend”, ka theksuar Kurti.
