Ambasadori i Italisë në Kosovë, Antonello De Riu ka takuar kryetarët e komunave të Leposaviqit, Zubin Potokut dhe të Zveçanit. Siç njofton ambasada, në takim është diskutuar për çështje të ndryshme, duke përfshirë arsimin, shëndetësinë dhe shqetësimit e sigurisë.
“Ambasadori De Riu u angazhua në diskutime produktive dhe të gjera me kryetarët e komunave të Leposaviqit, Lulzim Hetemi, Zubin Potok, Izmir Zeqiri, dhe Zveçan, Ilir Peci për disa çështje. Këto biseda mbuluan tema si mirëqenia sociale, arsimi, shëndetësia dhe shqetësimet e sigurisë brenda Komunave përkatëse”, thuhet në njoftimin e Ambasadës Italiane në Facebook.
Përveç adresimit të këtyre fushave kryesore të politikave publike, Ambasadori De Riu dhe kryetarët lokalë eksploruan gjithashtu rrugët e mundshme për të rritur bashkëpunimin ndërkulturor dhe bashkëpunimin midis komuniteteve të tyre.
“Takimet dhanë një mundësi për të identifikuar iniciativa të dobishme reciproke dhe për të zhvilluar strategji për të forcuar lidhjet ndërkulturore dhe mirëkuptimin midis të gjitha komuniteteve rezidente”, thuhet tutje në njoftimin e ambasadës.
