Presidenti sirian Ahmad al-Sharaa ka mohuar pretendimet se është pjesë e Vëllazërisë Myslimane dhe ka thënë se është “viktima më e madhe” e ISIS-it.
Në komentet e botuara të martën nga gazeta Al-Nahar e Kuvajtit, al-Sharaa shtoi se “të gjitha ideologjitë nacionaliste dhe islamiste në rajon kanë dështuar”, shkruajnë mediat e huaja.
Presidenti sirian theksoi se çdo thirrje për shkëputje brenda Sirisë “nuk do të mbetet gjë tjetër veçse ëndërr”, duke marrë parasysh se “zgjidhjet me kurdët dhe popullin e Sweidës janë të mundshme vetëm brenda kornizës së unitetit të vendit”.
Ai pohoi se “të gjitha zgjidhjet me kurdët dhe Sweida-n mund të diskutohen përveç shkëputjes”, duke shtuar se “politika e shtetit bazohet në tolerancë, jo në hakmarrje”.
Sa i përket Izraelit, al-Sharaa tha se marrëdhënia është e lidhur ekskluzivisht me kthimin e Lartësive të Golanit dhe zbatimin e marrëveshjes së vitit 1974, duke theksuar se “nuk mund të flitet për një marrëveshje paqeje para kësaj”.
Presidenti sirian konfirmoi gjithashtu refuzimin e tij për ndërhyrje në punët e brendshme të Libanit dhe për idenë e një “lumi zjarri” që ndan Sirinë dhe Libanin.
Ai vlerësoi qëndrimin e Irakut “politikisht dhe ekonomikisht”.
Së fundmi, al-Sharaa pohoi se Siria “po shkon drejt një rilindjeje”, duke shtuar: “Vendi ynë është i fortë në vetvete dhe në aleancat e tij”.
