Tetë të lënduar në aksidentin zinxhiror pranë Vërmicës, mes tyre një fëmijë dhe një grua shtatzënë
Një aksident i rëndë trafiku ka ndodhur mëngjesin e së shtunës në autostradën “Ibrahim Rugova”, rreth katër kilometra para Pikës Kufitare në Vërmicë, ku janë përfshirë gjashtë automjete.
Zëdhënësi i Policisë së Kosovës, Bajram Krasniqi, ka konfirmuar se si pasojë e aksidentit tetë persona kanë mbetur të lënduar.
“Në ora 08:10, policia është njoftuar për një aksident trafiku të ndodhur në autostradë (4 km para Pikës Kufitare Vërmicë). Në aksident janë përfshirë gjashtë automjete. Si pasojë e aksidentit tetë persona kanë pësuar lëndime. Policia (Njësia e Autostradës) është duke u marrë me procedurat në vendngjarje”, ka deklaruar Krasniqi.
Sipas informacioneve nga vendi i ngjarjes, mes të lënduarve janë edhe një fëmijë dhe një grua shtatzënë në muajin e shtatë.
Të gjithë të lënduarit janë transportuar me autoambulanca për trajtim mjekësor në Spitalin Rajonal të Prizrenit. Deri më tani nuk raportohet për viktima, ndërsa gjendja e tyre shëndetësore nuk është bërë ende e ditur.
Në vendin e ngjarjes kanë dalë njësitet e Policisë së Kosovës dhe ekipet e emergjencës, të cilat kanë ofruar ndihmën e parë dhe po kryejnë veprimet e nevojshme hetimore.
Për shkak të aksidentit, njëra korsi e autostradës në drejtimin Prizren–Vërmicë është bllokuar, duke shkaktuar kolona të gjata automjetesh dhe vonesa në qarkullim. Policia u bën thirrje drejtuesve të automjeteve të respektojnë udhëzimet e zyrtarëve në terren.
Shkaqet e aksidentit mbeten ende të paqarta dhe pritet të sqarohen pas përfundimit të hetimeve nga Policia e Kosovës.
