Zëvendësministri i Punëve të Jashtme dhe Diasporës, Kreshnik Ahmeti, filloi vizitën zyrtare në Mbretërinë e Tajlandës, ku u prit nga homologu i tij Sihasak Phuangketkeow. Në takim u diskutua për përfundimin e një sërë marrëveshjesh, me theks të veçantë në sektorët e kulturës dhe ekonomisë.
Sipas njoftimit nga MPJD, në takim u bisedua për marrëdhëniet bilaterale mes dy vendeve, koordinimin multilateral dhe zhvillimet aktuale në të dyja vendet dhe rajonet përkatëse.
“Në kuadër të bashkëpunimit bilateral u diskutua për përfundimin e një sërë marrëveshjesh, me theks në sektorët e kulturës dhe ekonomisë.
Në rrafshin e koordinimit multilateral, u diskutua me palën tajlandeze për planet e Republikës së Kosovës për anëtarësim në organizata ndërkombëtare si domosdoshmëri për ushtrim të të drejtave të qytetarëve të Kosovës dhe u kërkua përkrahja Tajlandës”, thuhet në njoftim.
Zëvendësministri Ahmeti falënderoi zëvendësministrin Phuangketkeow për mbështetjen e vazhdueshme të Tajlandës për Kosovën.
