Pas marrjen në pyetje kreu i FFK-së, Agim Ademi është nxjerrë i lidhur me pranga në duar nga stacioni policor në Prishtinë.
Ai është shoqëruar nga pjesëtarët e Policisë së Kosovës dhe disa infermierë që e morën për ta dërguar për trajtim në spital.
Kryetari i Federatës së Futbollit të Kosovës (FFK), Agim Ademi është arrestuar gjatë ditës së sotme.
Me urdhër të prokurorit, Ademit i është caktuar masa e paraburgimit prej 48 orë deri në marrjen e një vendimi tjetër nga organet e drejtësisë.
Burime të KosovaNews mësojnë se kësaj radhe Ademi është arrestuar pasi dyshohet për keqpërdorime të mëdha që janë bërë në Federatën e Futbollit të Kosovës (FFK).
VIDEO:
Ndërkaq Prokuroria Themelore në Prishtinë ka lëshuar një njoftim ku bën të ditur se Agim Ademi, është dërguar në mbajtje për 48 orë.
Sipas Prokurorisë Ademi është paraqitur në Polici për një intervistë pas ftesës së këtyre të fundit një ditë më parë.
Njoftimi pa ndërhyrje i Prokurorisë:
KOMUNIKATË PËR MEDIA
Prishtinë, 22 mars 2023– Prokuroria Themelore në Prishtinë, njofton opinionin publik se pas ndërmarrjes se veprimeve paraprake hetimore, Prokurori i Shtetit ka lëshuar aktvendim mbi ndalimin e Kryetarit të Federatës së Futbollit të Kosovës, për shkak të dyshimit të kryerjes së veprave penale “Keqpërdorimi i besimit”, nga neni 330 dhe “Shmangie nga tatimi”, nga neni 307 të KPRK-së.
I njëjti me urdhër të Prokurorit të Shtetit është dërguar në mbajtje në kohëzgjatje prej 48 orësh, derisa në koordinim me Policinë janë duke u ndërmarrë veprime hetimore lidhur me këtë çështje penale.
