Presidenti i Federatës së Futbollit të Kosovës, Agim Ademi, ka reaguar pas fitores historike të Kosovës dhe sigurimit të fazës “Play-Off” për kualifikim në Kupën e Botës 2026. I entuziazmuar, Ademi ka përdorur shprehjen e njohur të kryetarit të Drenasit, Ramiz Lladrovci, për të shprehur emocionet e mëdha pas kësaj arritjeje.
“Kosovë lujta, jemi në Play Off”, e ka nisur Ademi reagimin e tij.
Kreu i FFK-së ka falënderuar futbollistët, stafin teknik dhe të gjithë ata që ndër vite kanë kontribuar për fanellën dardane.
“Nëntori ka qenë gjithmonë muaj i ngjarjeve historike për popullin tonë dhe sot ne shkruam një tjetër faqe të rëndësishme”, ka deklaruar ai.
Në postimin e tij, Ademi ka vlerësuar punën, përkushtimin dhe besimin e futbollistëve dhe ka përmendur secilin prej tyre, duke shprehur mirënjohje edhe për të gjithë ish-lojtarët që kanë qenë pjesë e Kombëtares qoftë edhe në një grumbullim.
Postimi i plotë i Ademit:
🇽🇰 “Kosovë lujta, jemi në Play Off. Urime Kosovë! Historia vazhdon, jemi në Play-Off të kualifikimeve për Kupën e Botës 2026! Ky është një sukses i jashtëzakonshëm për Kombëtaren tonë, një objektiv për të cilin pakkush besoi në fillim të këtij cikli, por që djemtë tanë e realizuan me punë, përkushtim dhe besim të palëkundur.
Krenar me futbollistët tanë, me stafin e Kombëtares në krye me strategun Franco Foda dhe me çdo mbështetës dardan, në Kosovë dhe kudo në botë.
[…]
Rrugëtimi ynë drejt ëndrrës së madhe vazhdon, me vlerat, me karakterin dhe me shpirtin luftarak që na identifikon.
Nëntori ka qenë gjithmonë muaj i ngjarjeve historike për popullin tonë dhe sot ne shkruam një tjetër faqe të rëndësishme.
Forca Kosovë!” 🇽🇰🔥
Kosova, me këtë fitore të madhe dhe kualifikimin në Play-Off, është një hap më afër ëndrrës për të siguruar pjesëmarrjen e parë në historinë e saj në Kupën e Botës.
