Sipas të dhënave nga Instituti i Statistikave, pjesa më e madhe e aborteve në Shqipëri po kryhen nga adoleshentët kryesisht te vajzat 18-vjeçare ndodhin 140 ndërprerje shtatzënie për çdo 1 mijë lindje të gjalla.
Gjinekologu Ernald Zeqja për KosovaNews thotë që shkak për abort është mosha e re dhe papërgjegjësia e tyre.
“Shkak është mosha e re, nuk janë të përgjegjshëm, nuk e shikojnë veten si baba ose nënë e ardhshme. Kryesisht janë vendime që merren nga të dy partnerët”.
Sipas mjekëve gjinekologë një tjetër arsye e shtimit të aborteve te vajzat adoleshente, është edhe ulja e moshës së kontaktik seksual.
“Me hapjen, me lirinë që ne kemi këto vite, patjetër që kjo moshë është ulur. Dhe kjo ka edhe problemet e veta”, thotë Zeqja. “Një gjë tjetër që vërej është mungesa e informacionit. Dikur kishte shumë organizata që merreshin me informimin mbi kontracepsionin. Tani nuk ka”.
Ndryshe nga popullata në përgjithësi, abortet te vajzat e reja kanë një specifikë. “Abortet tek adoleshentët ndodhin bile në familje të miredukuara, të mirarsimuara dhe me të ardhura ekonomike të mira”,shprehet Zeqja.
