Lidhja Demokratike e Kosovës ka mbajtur sot mbledhjen e Këshillit të Përgjithshëm. Në këtë mbledhje kryetari i LDK-së, Lumir Abdixhiku, ka kritikuar qeverisjen e Albin Kurtit.
Abdixhiku ka deklaruar se qytetarëve u kanë mjaftuar tri vite për ta kuptuar paaftësinë fondamentale të kësaj qeverie.
Ai u shpreh se sot shtyllat identitare të Kosovës janë vënë në peshore të fatit të popullistëve.
“Kosova është shtet i pavarur dhe sovran dhe kjo e ardhme sot duket e zymtë, e pa perspektivë. Sot teksa qëndrojmë këtu në një udhëkryq kritik të vendit shtyllat identitare të Kosovës janë vënë në peshoren e fatit të popullistëve. Ato po gërmohen, rrënohen dhe tjetërsohen si synim ideologjik i mosbesueseve të pavarësisë”, ka thënë Abdixhiku.
I pari i LDK-së ka shtuar se kjo Qeveri nuk ka lënë asnjë shenjë në asnjë fushë.
“Sot është moment reflektimi. Ky moment thërret për përgjegjësi, duhet dorëheqje. LDK refuzon farsën e darkave, LDK është e gatshme dhe kërkojmë dorëheqje të qeverisë. Fillimisht dorëheqja e pastaj shpërbërja”, ka thënë Abdixhiku.
Ai pati edhe një mesazh të tërthortë për PDK-në që kishte pranuar të takohet me kryeministrin Kurti ditë më parë.
“Pas tre vjet e gjysmë popullizëm, e nxitje të propagandës pushteti kishte menduar zgjedhjen e instrumentalizimit të opozitës si shpëtim individual nga dështimi i madh, fatkeqësisht në këtë instrumentalizim ka gjetur një aleat”, tha Abdixhiku, duke shtuar që të bashkuarit të caktojnë datën e “ne te djathtët do ta caktojmë festën”
