Gjatë ditës së sotme kryetari i Lidhjes Demokratike të Kosovës Lumir Abdixhiku me pompozitet të madh e prezantoi Hysen Çekaj , djalin e Heroit Salih Çekaj, si aderim të ri në LDK.
Njëherit Abdixhiku bëri të ditur se Hysen Çekaj do të kandidojë për deputet në listën e LDK-së në zgjedhjet e ardhshme. Por në një kërkim të thjeshtë në profilin e Hysen Çekajt në facebook, ai shihet se është mbështetës i kësaj partie që një kohë të gjatë.
Madje para dy vitesh, Çekaj i cili jeton në Gjermani e kishte shoqëruar kryetarin e LDK-së gjatë një vizite zyrtare në parlamentin e Hamburgut .
“Një gjeneratë e re e LDK-së fillon të besojë në vlerat që krijuan shtetin tonë. Demokracia, lidhja perëndimore dhe vazhdimësia me miqtë tanë gjermanë. Ishte një nder të shoqëroi kryetarin tonë të ri, Faleminderit”, kishte shkruar Çekaj në postimin e tij të cilin e kishte shoqëruar me disa fotografi së bashku me Abdixhikun.
Edhe në disa postime të tjera të Çekajt shihet mbështetja e madhe që i kishte dhënë publikisht në të kaluarën kësaj partie, madje edhe në zgjedhjet e fundit të vitit 2021.
