Kryeministri i Malit të Zi, Dritan Abazoviq ka thënë se i ka bërë thirrje kryeministrit Albin Kurti që të mos hyjë në konflikt me ndërkombëtarët dhe të përpiqet ta zgjidhë këtë çështje me dialog.
Sipas tij, i pari i Qeverisë në Kosovë ka vullnet për t’i tejkaluar problemet.
“Më tha se tashmë kanë kontakte me Brukselin dhe se do të ketë bisedime. Përshtypja ime është se ka vullnet për t’i tejkaluar problemet”, tha Abazoviq për RTCG.
Ai ka shtuar se Mali i Zi është i vetmi vend në rajon që nuk ka çështje të hapura me askënd. Ka deklaruar se qeveria e tij nuk ndërhyn në marrëdhëniet e askujt, por se i ka ofruar kryeministrit të Kosovës, Albin Kurti që një raund negociatash me Serbinë ta mbajë në Mal të Zi.
“Nëse ne mund t’i ndihmojmë ata nga ana logjistike, ne jemi gati”, tha ai.
Ai beson se situata në Kosovë nuk do të përshkallëzohet.
“Por kur shohim se çfarë gjërash po ndodhin, nuk mund të jemi të qetë. Nuk është mirë t’i kthehemi politikës së viteve nëntëdhjetë. Kur sheh disa skena, ke ndjesinë se është një ‘deja vu’, dhe unë mendoj se është keq. Shpresoj që arsyeja të mbizotërojë”, tha ai.
