Rreth 280 punonjës të kompanisë Rajonale për Menaxhimin e Mbeturinave “Pastërtia” kanë nisur grevën për shkak të pakënaqësive të tyre nga menaxhmenti i cili nuk ua kishte kryer obligimet e premtuara për rritjen e pagave për 50 eurosh dhe për pagesat e trustit pensional prej 28 muajve.
Punonjësit që nga mëngjesi i së hënës kanë ndërprerë të gjitha shërbimet ndaj qytetarëve, derisa të shqyrtohen kërkesat e tyre. Kështu për të disatën herë me radhë po ndodh një situatë e tillë që sjell kolaps në gjithë territorin e Komunës, pasi Komuna e Ferizajt nuk po merr për bazë kërkesat e këtyre punonjësve.
Mexhid Ramusa, kryetar i sindikatës së punonjësve në këtë kompani ka thënë se menaxhmenti ka bërë një varg shkeljesh ligjore edhe për bartjen e mbeturinave në Fushë-Kosovë derisa deponia ekziston në territorin e Ferizajt.
Sipas tij, drejtori i kësaj kompanie Basri Syla është duke e mbajtur jashtëligjshëm këtë pozitë, derisa është pjesë edhe e kryesisë së AAK-së.
“Ne jemi futur në grevë dhe nuk do ta ndalim derisa të shqyrtohen kërkesat tona legjitime. Kemi pasur premtime që nga shtatori të rriten pagat për 50 euro për punëtor dhe të paguhet trusti pensional prej 28 muajsh për punëtor, gjë që nuk ka ndodhur, prandaj edhe këtu ka shkelje nga menaxhmenti. Drejtori Basri Syla para se të vinte drejtor është dashur 3 vjet më herët të jep dorëheqje nga kryesia e AAK-së sepse ashtu e thotë ligji, mirëpo ai prapë merret me politikë”, ka thënë Ramusa, duke paralajmëruar protestë për të mërkurën para objektit të KRM “Pastërtia”.
Në anën tjetër drejtori i kësaj kompanie Basri Syla, nuk u është është përgjigjur në telefon pyetjeve të KOHËS.
Ndërkohë, kompania nëpërmjet një komunikate për media ka njoftuar klientët se nuk do të ketë shërbim për shkak të grevës.
“Njoftohet gjithë klientët se KRM ‘Pastërtia’ nuk do të operojë për shkak të grevës së punonjësve deri në lajmërimin tjetër. Luten klientët për mirëkuptim dhe të mos hedhin mbeturinat jashtë, deri në njoftimin e radhës”, thuhet në komunikatë.