Ndjenja e thellë e vetmisë, e cila tradicionalisht i atribuohet të moshuarve, në fakt i prek më shumë ata që janë dukshëm më të rinj, tregon një studim i Qendrës Gjermane për Çështjet e Moshës (DZA)
Hulumtimi i ri i DZA-së tregon se njerëzit mbi 76 vjeç, mesatarisht, ndihen më pak të vetmuar sesa ata që janë ndërmjet 43 dhe 55 vjeç.
“Ky rezultat bie ndesh me bindjen e përhapur se vetmia rritet me moshën”, theksojnë autorët.
Si shpjegim i mundshëm, analiza tregon se të moshuarit shpesh kënaqen me një rreth shoqëror më të vogël, por të qëndrueshëm, ndërsa të rinjtë ende kërkojnë më shumë kontakte për të ndier lidhje shoqërore.
Një tjetër arsye mund të jetë fakti se, ndër më të moshuarit, ka më pak persona të vetmuar sepse statistikat tregojnë që ata që nuk ndihen të vetmuar jetojnë më gjatë.
Ministrja për Familjen, Karin Prien, e ka komentuar studimin duke theksuar se “vetmia nuk prek vetëm të moshuarit”.
“Ajo është e pranishme edhe në moshën e mesme dhe shpesh është e padukshme dhe e nënvlerësuar”, ka thënë ajo.
Sipas saj, pikërisht në këtë fazë të jetës, ndjenja e vetmisë mund të jetë veçanërisht e theksuar te disa persona, pasi humbasin ndjenjën e lidhjes ndërsa përpiqen të gjejnë balancën mes presionit të punës dhe detyrimeve familjare.
Problemi i vetmisë është i ndërlikuar dhe nuk ndjek modele të thjeshta demografike. Një nga “faktorët e qartë të rrezikut” është statusi socio-ekonomik.
“Sa më të ulëta të jenë të ardhurat, aq më i madh është rreziku.”
Të punësuarit ndihen më rrallë të vetmuar sesa të papunët.
Sipas studimit, afërsisht një në njëmbëdhjetë persona mbi 43 vjeç ka deklaruar se ndihet “shumë i vetmuar”. Në përgjithësi, njerëzit në gjysmën e dytë të jetës shfaqin një nivel mesatar vetmie.
Ky studim bazohet në të dhënat e Hulumtimit Gjerman për Plakjen (DEAS), i cili çdo vit anketon një mostër përfaqësuese të popullatës së synuar. Autorët kanë përdorur të dhëna nga vitet 2017 dhe 2023
