Shefja e Grupit Parlamentar të Lëvizjes Vetëvendosje, Mimoza Kusari-Lila, ka njoftuar se Kryesia e Kuvendit të Kosovës ka caktuar dy seanca për këtë javë.
Në konferencën për media të mbajtur pas mbledhjes së Kryesisë, Kusari-Lila ka thënë se të enjten do të mbahet seancë e rregullt, në rend dite të së cilës do të jetë edhe shqyrtimi i rezolutës për adresimin e çështjes së faturave të tatimit në pronë.
Ndërsa, seanca tjetër është solemne për nder të përvjetorit të Pavarësisë së Kosovës dhe do të mbahet të premten e 17 shkurtit.
“Nga mbledhja e rregullt e Kryesisë së Kuvendit u darkordua që një seancë e re e rregullt e Kuvendit të mbahet në ditën e enjte, më 16 shkurt me propozimet e pikave të rendit të ditës si vijon… shqyrtimin e rezolutës për adresimin e çështjes së faturave të tatimit në pronë. Gjithashtu do të mbajë seancë solemne më 17 shkurt për nder të pavarësisë së vendit”, ka thënë ajo.
Shefi i Grupit Parlamentar të Aleancës për Ardhmërinë e Kosovës, Besnik Tahiri, ka thënë se Kuvendi duhet t’i ngrejë çështjet madhore për vendin, teksa ka akuzuar Lëvizjen Vetëvendosje që për dy vjet në krye të Qeverisë, nuk ka bërë mjaftueshëm.
“Kuvendi i Kosovës dinamikat e veta duhet t’i ngrejë, çështjet madhore për vendin janë duke na trokitur në derë, duke përfshirë çështjen e marrëveshjes, mirëpo mbi të gjitha gjendjen e rëndë sociale ekonomike në vend. I humbëm dy vjet. Nesër është 14 shkurti, 2 vjet nga fitorja e Vetëvendosjes, për dy vjet ka vetëm fjalë dhe asnjë vepër”, ka thënë ai.
