Zëvendëskryeministri i Kosovës, Besnik Bislimi, ka thënë se plani evropian për normalizimin e marrëdhënieve Kosovë – Serbi, që njihet ndryshe si franko-gjerman, nënkupton ‘de facto’ njohjen e dy shteteve.
Bislimi në konferencë për media ka thënë se kryeministri i Kosovës, Albin Kurti, gjatë takimit të fundit me emisarin e BE-së, Miroslav Lajçak, ka diskutuar vetëm për propozimin evropian, por jo edhe për marrëveshjet e arritura në dialog.
“Platforma tregon vetëm principet e veprimet bazë, ndërkohë gjithçka që ka të bëjë me implementimin e saj, duhet diskutuar në aneksin implementues mes palëve në Bruksel. Plani franko-gjerman tregon kornizën bazë, që nënkupton njohjen ‘de facto’ të dy shteteve, ndërkohë se si do të jetë sekuencimi i hapave, cilat marrëveshje nuk janë më të rëndësishme, e cilat duhet modifikuar, cilat duhet të zbatohen e si të zbatohen, për këtë do të diskutojnë palët në Bruksel. S’ka pasur diskutim për asnjë marrëveshje paraprake, por për kornizën e propozimit franko-gjerman”, ka thënë Bislimi në konferencë për media.
Bislimi ka thënë se gjashtë kushtet që prezantoi kryeministri Kurti pas takimit, “tregojnë se mund të diskutohet për mekanizmin e avancuar të mbrojtjes së të drejtave të njeriut”.
“Gjashtë kushtet që i ka prezantuar kryeministri Kurti janë parakushte që tregojnë se mund të diskutohet për mekanizmin e avancuar të mbrojtjes së të drejtave të minoriteteve. BE-ja ka vërejtjet e saj në dy kushte, por cilat janë ato dhe pse ka vërejtje mund ta pyesni Lajçakun kur është në Prishtinë”, është shprehur Bislimi.
Tutje, ai tha se gjatë takimit që ai pati bashkë me Kurtin e Lajçakun, nuk ka pasur diskutim për asnjë marrëveshje paraprake, duke lënë të nënkuptohet që nuk është folur për Asociacionin e komunave me Shumicë serbe.
