Ministri i Mjedisit dhe Infrastrukturës, Liburn Aliu ka njoftuar se është miratuar Udhëzimi Administrativ për Kontrollimin Teknik të Automjeteve. Në këtë udhëzim të publikuar në web faqen e Ministrisë së Infrastrukturës janë vendosur kritere strikte gjatë kontrollimit teknik të automjeteve.
Ministri Aliu ka thënë se gjatë kontrollit teknik të automjeteve janë përcaktuar kushtet që duhet të plotësohen nga subjektet për kryerjen e kontrollimit teknik të automjeteve dhe procedurave tjera në përgjithësi ku përfshihet vendosja dhe monitorimi i kamerave dhe pajisje për matjen e gazrave serrë dhe matjen e komponentëve të paqëndrueshme organike në automjete.
“Është miratuar Udhëzimi Administrativ për Kontrollimin Teknik të Automjeteve.
Përmes këtij Udhëzimi janë përcaktuar kushtet që duhet të plotësohen nga subjektet për kryerjen e kontrollimit teknik të automjeteve dhe procedurave tjera në përgjithësi.
Gjatë kontrollimit teknik të automjetit do të bëhet monitorimi me video kamerë nga Ministria apo subjekti i autorizuar, me çrast do të sigurohen pamje nga fillimi i procedurës deri në përfundim të kontrollimit teknik të automjeteve, me qëllim të monitorimit të rezultateve të matjeve të automjeteve me linjë teknologjike.
Do të përdoren pajisje për matjen e gazrave serrë dhe matjen e komponentëve të paqëndrueshme organike në automjete, në mënyrë që të reduktohet emetimi i dioksidit të karbonit dhe ndotjes së ajrit duke kontribuar kështu në mbrojtje të shëndetit publik dhe përmbushjes së objektivave klimatike.
Viti 2023 do të shënojë një kthese të rëndësishme e të dobishme për digjitalizimin e shërbimeve elektronike për infrastrukturë.
”
