Nën patronazhin e kryeministrit, Albin Kurti dhe me organizimin e Ministrisë së Punëve të Jashtme dhe Diasporës, sot mbahet Forumi Ekonomik në mes të Republikës së Kosovës dhe Republikës së Kroacisë.
Pos Kurtit, në forum do të jenë të pranishëm ministra dhe zëvendësministra të Qeverisë së Kosovës dhe Qeverisë së Kroacisë.
Po ashtu do të marrin pjesë edhe përfaqësues të universiteteve dhe institucioneve tjera relevante si dhe përfaqësues të komuniteteve të biznesit nga të dyja vendet.
Në kuadër të forumit gjithashtu do të nënshkruhet një Marrëveshje Bashkëpunimi mes dy shteteve në fushën e turizmit. Forumi pritet të nis nga ora 11:00.
Ministria e Punëve të Jashtme e Kosovës në një njoftim të saj thekson se Republika e Kosovës mbetet e përkushtuar në forcimin e bashkëpunimit dhe marrëdhënieve të shkëlqyera që ka me Republikën e Kroacisë, si mike dhe partnere strategjike e vendit tonë.
