Vërshimet e fundit që e goditën vendin tonë gjatë javës së kaluar, kanë lënë pasoja të rënda në Komunat e Skënderajt, Mitrovicës dhe Klinës.
Sipas institucioneve përgjegjëse, vërshimet në Skënderaj kanë shkaktuar dëme rreth 15 milionë, në Mitrovicë mbi 13 milionë dhe në Klinë mbi 9 milionë euro.
Përkundër se dëmet që kanë paralizuar jetën e qytetarëve në zonat e prekura kalojnë miliona euro, deputeti i Kuvendit të Kosovës, njëherësh edhe njëri nga personat më të pasur të vendit, Behgjet Pacolli, ka thënë se pagën e tij të deputetit që është mesatarisht vetëm 1 mijë e 600 euro, do ta japë për të dëmtuarit nga vërshimet, transmeton KosovaNews.
Përveç kësaj, Pacolli, përmes një postimi në Facebook, ka ftuar njerëzit vullnetmirë dhe miqtë e tij të biznesit që të kontribuojnë në Fondacionin “Behgjet Pacolli” për t’i ndihmuar familjet e prekura nga vërshimet.
Ndërkaq, një situatë e tillë e rëndë e kishte goditur edhe shtetin e Shqipërisë në tërmetin e vitit 2019.
Në të njëjtën mënyrë ishin shkatërruar shtëpitë, rrugët, bizneset dhe vendbanimet duke shkaktuar kështu dëme në vlerë prej miliona eurosh.
Në këtë rast, ndryshe nga rasti i Kosovës, Behgjet Pacolli në atëkohë si ministër në detyrë i punëve të Jashtme të Kosovës, i kishte dhuruar Shqipërisë 1 milion euro nga buxheti i tij familjar si ndihmë për zonat e prekura.
Ky donacion sipas Pacollit në atë kohë kishte shkuar për rindërtimin e zonave të prekura nga tërmeti
”Unë u trondita kur pashë dëmet në jetën e njeriut dhe në infrastrukturë që tërmeti shkatërrues po lë pas në Shqipëri.
Kjo kërkon solidaritet dhe mbështetje për të siguruar që qytetarët e prekur mund të kthehen shpejt në jetën normale.
