Policia e Kosovës ka njoftuar se ka arrestuar tre persona në Ferizaj për vjedhje të rëndë.
Sipas komunikatës për media, vjedhja është kryer në shkollën e mjekësisë e cila është në ndërtim.
Në lidhje me këtë policët e rendit e më pas edhe policët hetues të stacionit në Ferizaj i kanë marrë veprimet e menjëhershme dhe janë nisur në drejtim të vendit të ngjarjes dhe në flagrancë kanë kapur tre persona të dyshuar të cilët ishin duke vjedhur kabllo të instalimit elektrik të objektit.
Në njoftim thuhet se të dyshuarit janë shoqëruar në stacionin e policisë në Ferizaj, përkatësisht në Njësinë e Hetimeve dhe pas intervistimit nga policët hetues, me vendim të prokurorit kujdestar nga Prokuroria Themelore në Ferizaj, të dyshuarit: F.K i moshës 29-vjeçare, E.P i moshës 21-vjeçare dhe M.A i moshës 20-vjeçare janë dërguar në mbajtje për 48 orë për procedura të mëtejme hetimore, ndërsa rasti është cilësuar “Vjedhje e rëndë” .
Vlera e dëmit sipas ankuesit përllogaritet të jetë 20 mijë euro.
