Sipas Indeksit të Krimit të publikuar nga Baza e të Dhënave Botërore (Numbeo), Kosova është vendi i 52-të më i sigurt në botë. Vendi i parë i takon Katarit.
Numbeo është një nga bazat e të dhënave më të mëdha dhe më të famshme në internet në botë, e cila merret me vlerësimin e nivelit të krimit dhe nivelin e sigurisë në vendet e botës duke matur shkallën e krimit të vrasjeve, grabitjeve, përdhunimet dhe të tjerat.
Sipas shkallës së sigurisë, Kosova ka 58.42 pikë nga 100 të mundshme. Ndërkohë, sa i përket krimit, Kosova ka 41.58 pikë.
Sipas Numbeot, në Kosovë korrupsioni dhe ryshfeti mbesin problematika të rrezikshmërisë së lartë.
Ndërkohë, Katari e ka kryesuar këtë listë për të pestin vit radhazi. Më 2018, Japonia zuri vendin e parë. Katari është në vendin e parë me 85.2 pikë.
Emiratet e Bashkuara Arabe (84.9), Tajvani (83.8), Ishulli i Manit (82), Omani (80.3), Hong Kongu (78.5), Armenia (78), Japonia (76.9), Zvicra (76.4) dhe Bahrejni (76) janë në 10-shen e parë.
Nga vendet e rajonit, Sllovenia është e 11-ta (75.8), Kroacia e 14-ta (75.4), Serbia e 47-ta (61.8), Mali i Zi i 50-ti (60.2), Maqedonia e Veriut e 53-ta (59.1) dhe Shqipëria e 68-ta (54.3).
Në pesë vendet e fundit janë Hondurasi (25.8), Afrika e Jugut (24.6), Afganistani (21.4), Papua New Guinea (20.1) dhe Venezuela (17.4).
