Besar Gashi nga Shërbimi Korrektues i Kosovës ka folur për të burgosurit që ndërlidhen me vepra të terrorizmit.
Gashi ka thënë se në Shërbimin Korrektues të Kosovës janë gjithsej 19 të burgosur që ndërlidhen me vepra të terrorizmit, në mesin e të cilëve ka edhe persona në paraburgim.
“Për momentin në Shërbimin Korrektues të Kosovës janë gjithsej 19 të burgosur që janë të dënuar, disa prej tyre janë në paraburgim, por që ndërlidhen me vepra të terrorizmit” – ka thënë Gashi.
Teksa ka treguar se si trajtohen këta të burgosur, ai ka bërë të ditur se ata janë të ndarë nga të burgosurit për vepra të tjera.
“Këta të burgosur trajtohen si të gjithë të burgosurit tjerë. Nuk janë bashkë me popullatën tjetër, e kam fjalën për të dënuarit. Të dënuarit i mbajmë në dy institucione: Qendra korrektuese në Dubravë dhe në Burgun e Sigurisë së Lartë. Mbahen në krahë të veçantë, nuk janë me popullatë të burgosur për vepra të tjera. Kurse, të paraburgosurit mbahen në paraburgim sikurse të gjithë të tjerët. Kjo ndarje është bërë në fillim të vitit 2017-2018 atëherë edhe kur është krijuar një metodologji lidhur me trajtimin e kësaj kategorie të të burgosurve” – ka thënë ai.
Sipas Gashit, nuk ka pasur ndonjëherë reagime për këtë ndarje.
“Arsyeja pse i kemi ndarë është që të mos ndikojnë tek të burgosurit, te popullata tjetër për vepra tjera, për shembull në ndikim në ide apo ideologji të tyre” – ka vijuar Gashi.
Gjatë emisionit ai gjithashtu ka thënë se shumica e këtyre të burgosurve janë pjesëmarrës në programe të ndryshme, sidomos në programin e punës, teksa ka potencuar se programi i punës është një ndër programet që ka pasur sukses më së shumti në procese si rehabilitimi dhe risocializimi, raporton Kallxo.
