Aleanca për Ardhmërinë e Kosovës (AAK) ka mbajtur sot mbledhjen e kryesisë në të cilën janë marrë disa vendime të rëndësishme që kanë për qëllim demokratizimin edhe me tutje të partisë.
Përmes një komunikate për media, AAK ka njoftuar se ka vendosur aplikimin e modelit të primareve në parti.
“Aleanca për Ardhmërinë e Kosovës ka vendosur sot aplikimin e modelit të primareve në parti. Kjo nënkupton që kandidaturat për deputetë te dalin nga primaret, që është një model i votimeve të brendshme për kandidatura për zgjedhje të përgjithshme si dhe kandidaturave për kryetarë komunash”, thuhet në komunikatën e AAK-së.
Komunikata e plotë e AAK-së:
Aleanca për Ardhmërinë e Kosovës ka vendosur sot aplikimin e modelit të primareve në parti. Kjo nënkupton që kandidaturat për deputetë te dalin nga primaret, që është një model i votimeve të brendshme për kandidatura për zgjedhje të përgjithshme si dhe kandidaturave për kryetarë komunash.
Është vlerësuar se një model i tillë është një hap tutje drejt demokratizimit të brendshëm dhe decentralizimit të vendimmarrjes, dhe si i tillë ka marrë mbështetjen e Kryesisë.
Kryesia e AAK-së, sot ka diskutuar edhe për zhvillimet politike në vend, ku i është dhënë mbështetje procesit të arritjes së një marrëveshjeje përfundimtare për njohje me Serbinë.
Po ashtu, në mbledhjen e sotme të kryesisë së AAK-së është përcaktuar edhe plani vjetor i punës së AAK-së për vitin 2023!
