Ministri i Mbrojtjes, Armend Mehaj, ka vizituar familjen e dëshmorit, Liman Rekaj në Prelez të Ferizajt.
Në këtë vizitë, Mehaj tha se nuk ka parë fshat e nuk kam takuar banorë më të organizuar sesa banorët e fshatit Prelez të Ferizajt.
“Mbetesh i mahnitur me projektet që ata kanë zhvilluar në të mirë të komunitetit me vetfinancim dhe me kontributin e secilit. Ashtu të organizuar ishin edhe para dhe gjatë luftës, duke u angazhuar dhe mbështetur Ushtrinë Çlirimtare të Kosovës”, tha ai.
I pari i Mbrojtjes tha se edhe Liman Rekaj i cili ishte shumë i ri në moshë, barrën e çlirimit të atdheut e ndjente mbi supet e tij.
“Atë e realizoi duke u kyçur në radhët e UÇK-së dhe sa i ngjante uniforma, ushtarit të disiplinuar e fortë të vendosur. Me vendosshmëri e qëndrueshmëri të jashtëzakonshme luftoi për lirinë e atdheut, fitorja dhe çlirimi i atdheut u bë realitet falë kontributit të tij dhe të gjithë luftëtarëve të UÇK-së. Ne do të vazhdojmë të ecim në rrugën që ata na e trasuan .Lavdi!”, ka shkruar mes tjerash ministri Mehaj.
