Kryeministri i Kosovës Albin Kurti dhe ministrja e Ekonomisë, Artane Rizvanolli, përmes një video-mesazhi të përbashkët, kanë paralajmëruar se dy muajt e ardhshëm do të jenë kritikë në përballje me krizën energjetike.
Kurti ka thënë se për furnizim të rregullt e me çmime të përballueshme është i nevojshëm kursimi i energjisë elektrike.
“Dua t’ju rikujtoj që dy muajt që kemi para nesh janë kritik në përballje me krizën energjetike. Andaj për të vazhduar furnizimin e rregullt dhe me çmime të përballueshme, për të kursyer buxhetin tuaj e të Republikës së Kosovës, u bëj thirrje dhe inkurajoj që ta vazhdoni e ta intensifikoni kursimin e energjisë”, ka theksuar Kurti.
Ai u ka thënë qytetarëve që nëse kanë mënyra të tjera të ngrohjes, përveç energjisë elektrike, t’i shfrytëzojnë ato dhe se Qeveria do të vijojë të bëjë gjithçka për të ju lehtësuar përballjen me krizën energjetike.
Ai ka folur edhe për mjetet që Qeveria ka ndarë deri më tani për të subvencionuar energjinë.
“Të dashur qytetarë, për të ju ndihmuar në përballje me krizën energjetike kemi ndarë mbi 95 milionë euro. Qe nga muaji shkurt kemi subvencionuar faturat e energjisë elektrike për të gjithë juve. Kemi paguar mbi 52 milionë euro për familje dhe mbi 37 milionë euro për biznese, për faturat e periudhës shkurt-dhjetor 2022. Që nga muaji shtator kemi dhënë subvencion shtesë për mbi 200 mijë familje që kanë kursyer energjinë deh që nga tetori kemi subvencionuar blerjen e pajisjeve efiçiente për ngrohje për mbi 8 mijë familje”, është shprehur Kurti.
Ndërsa ministrja Rizvanolli ka falënderuar qytetarët, të cilët, sipas saj, kanë ndihmuar në zbutjen e krizës. “Të dashur qytetarë në zbutje të krizës keni ndihmuar edhe ju, secili e secila që jeni kujdesur për të racionalizuar konsumin e energjisë elektrike. Pas katër vjetësh të rritjes së konsumit të energjisë elektrike, gjatë vitit që lamë pas, për herë të patë është ulur konsumi nga familjet. Vetëm në nëntor familjet kanë shpenzuar 15% më pak energji elektrike në krahasim me vitin paraprak”, ka deklaruar Rizvanolli.
Lexoni edhe:
