Nga Kajmaku i Pushtetit të Partisë Demokratike të Kosovës (PDK) në Prizren, kanë filluar të përfitojnë edhe shokët e djalit të kryetarit të Komunës, Shaqir Totaj, përcjell KosovaNews
Kështu ka pretenduar, asamblisti i Lëvizjes Vetëvendosje në këtë Komunë, Selman Sokoli duke thënë se këtë herë një kontratë për kinse marketing, e paska fituar shoku i djalit të kryetarit të Komunës së Prizrenit.
“Tenderomania e PDK-së ska të ndalur. Këtë herë një kontratë për kinse marketing, e paska fituar shoku i djalit të kryetarit të Komunës së Prizrenit. Taksat e qytetarëve në xhepat e klaneve dhe grupeve të pushtetarëve.”, ka shkruar Sokoli në rrjetin social facebook.
Sipas tij, stërkeqja në qeverisje; keqpërdorimi i parasë publike; kontrata të paligjshme; korrupsioni i vazhdueshëm etj., ishin veti të qeverisjeve nacionale të para ardhjes së ndryshimit të madh, sidomos pas 14 shkurtit 2021.
Tutje, asamblisti Sokoli ka shkruar se në nivel nacional është ndalë keqpërdorimi i financave publike, por në atë lokal krimi e korrupsioni është rikthyer e ka vazhduar si kurrë më parë, nga opozita e sotme nacionale e pushteti i tanishëm lokal.
“Media nacionale, organe të hetuesisë, shoqëri civile dhe gjithë akterët shoqëror duhet të reagojnë e veprojnë për t’i denoncuar dhe ndalur këto keqpërdorime të pushtetit të PDK-së në Prizren.”, ka shkruar Sokoli në facebook.
