Shqipe Pantina është bërë pjesë e Lidhjes Demokratike të Kosovës (LDK), njoftoi të hënën kreu i kësaj partie, Lumir Abdixhiku.
Ai shkroi në Facebook se është i lumtur me aderimin e Pantinës në LDK.
“Ajo përveç se pasuron radhët tona politike, vazhdon ciklin e bashkëngjitjeve që anëtarë të jetës publike, politike, medias e shoqërisë civile po e bëjnë me LDK-në. Lidhja Demokratike e Kosovës sot është bërë adresa e vetme e profesionistëve të tillë. Nga këtu, kështu, e kemi për obligim t’i ofrojmë qytetarëve të vendit platformë politike të denjë për rrugëtimin e ardhëm që Kosova e meriton”, tha ai.
Pantina ishte pjesë e Kuvendit të Kosovës për dy mandate. Në periudhën 2014-2017, ishte pjesë e Lëvizjes Vetëvendosje, ndërsa 2017-2019, pjesë e Partisë Socialdemokrate.
Ajo është paraqitur edhe nëpër debate televizive dhe ka folur shpesh herë për politikat e majta, si një person që angazhohet për këtë çështje. Por, Pantina tani aderoi në LDK, që është parti e djathtë.
“LDK sot është bërë adresë ku shumë veprimtarë politikë, të reja e të rinj që duan të kontribuojnë për një të ardhme më të mirë për vendin, familjen dhe veten e tyre, po i bashkohen kësaj partie. Jam shumë e lumtur të bëhem pjesë e këtij grupi dhe shpresoj qe më përvojën time profesionale dhe politike të ndihmoj në hartimin e platformës programore që orientim ka zhvillimin e vendit dhe mirëqenien e qytetarëve”, ka shkruar mes tjerash Pantina.
