Kryeministri i Kosovës, Albin Kurti, ka mbajtur sot një konferencë për media, ku ka bërë të ditur se deri më tani në ministri për Punë të Jashtme dhe Diasporë, nuk ka asnjë njoftim se ndonjë shtet ka tërhequr njohjen ndaj Kosovës.
Sipas Kurtit, ky është vetëm një pretendim i presidentit të Serbisë, Aleksandër Vuçiq, duke parë se e ka humbur mbështetjen e partnerëve perëndimorë, njofton KosovaNews.
Kurti ndër të tjera tha se të premten se nuk ka pranuar ftesë nga Bashkimi Evropian për vazhdimin e bisedimeve lidhur me dialogun me Serbinë.
Kreu i ekzekutivit shtoi se kjo është e çuditshme për të pasi në takimin e 18 gushtit palët janë pajtuar që të takohen çdo muaj në mënyrë që marrëveshja finale të arrihet sa më parë.
“Ftesë për dialog në Bruksel, takim të lartë të radhës nuk ka ende. Kjo është e çuditshme për mua sepse më 18 gusht jemi marrë vesh që të kemi takime çdo muaj. Kam dhënë një propozim për kornizën e përgjithshme të marrëveshjes. Më 9 shtator erdhën emisarët evropian francez dhe gjerman, tri javë pas atij takimi. Tash që po bëhen katër muaj nga ai propozim e kemi pasur vetëm një takim në Bruksel. Kam pritur se do të ketë dinamikë dhe intensitet të shtuar të bisedimeve”, u shpreh Kurti para gazetarëve.
Kurti për koeficientin e pagave: Nuk po mbahet fshehtë, po përllogaritet
Kryeministri i Kosovës, Albin Kurti u pyet edhe sot se pse s’po bëhet publik koeficienti për pagat.
Para gazetarëve, Kryeministri Kurti tha se kjo do të bëhet brenda muajit.
“S’ka asgjë këtu që mbahet fshehur. I takon administratës publike, që është në kuadër të Ministrisë së Brendshme, ta sjellë këtë përllogaritje sa më parë. Ajo që dihet është se buxheti i gjithëmbarshëm është se 745 mln euro”.
