Kryeministri Albin Kurti, bashkë me ministrin e Bujqësisë, Pylltarisë dhe Zhvillimit Rural, Faton Peci kanë prezantuar sot nisjen e pagesave direkte për bujqit e Kosovës, e që sivjet janë paraparë mbështetje në emër të subvencioneve mbi 100 milionë euro, raporton KosovaNews.
Kjo është hera e parë që Programi për Subvencione po hapet qysh në javën e parë të vitit kalendarik.
Kryeministri tha se falë rritjes së mbështetjes institucionale viti i kaluar është përmbylluar me më shumë prodhim në fushën e bujqësisë.
Ai tha se sivjet parashihet që të ketë mbështetje edhe më të madhe për bujqësinë në Kosovë.
“Në kuadër të pagesave direkte që nisin nga sot janë paraparë 87 milionë euro nga Qeveria e Kosovës dhe kur këtu shtohen edhe marrja e donacioneve nga jashtë, kjo mbështetje do të rritet dhe do të kalojë 100 milionë euro”, ka thënë Kurti.
Edhe ministri i Bujqësisë, Pylltarisë dhe Zhvillimit Rural, Faton Peci tha se viti i kaluar ishte i suksesshëm për bujqësinë e Kosovës në të gjitha fushat, dhe kjo falë mbështetjes së Qeverisë së Kosovës dhe thithjes së donacioneve.
“Po e fillojmë edhe këtë vit shumë mbarë për pagesat direkte për bujqit. Vjet janë dhënë mbi 61 milionë euro dhe kjo ka reflektuar që të këtë rritje me 44 për qind në eksporte. Kurse sivjet mbështetja do të jetë edhe më e madhe”, tha Peci, derisa ka treguar se për sa do të rritet subvencioni për të gjitha kulturat bujqësore./KosovaNews
