Kryetari i Aleancës për Ardhmërinë e Kosovës, Ramush Haradinaj, ka kritikuar sërish kryeministrin Albin Kurti, sa u përket marrëdhënieve me Shtetet e Bashkuara të Amerikës (ShBA).
Këtë herë ka folur për një deklaratë të Kurtit, bërë në një intervistë për Zërin e Amerikës të enjten.
Kurti ka thënë se ai “nuk mund t’i përfaqësoj Shtetet e Bashkuara të Amerikës, ambasadori amerikan dhe as sekretari i shtetit apo departamenti i shtetit nuk mund ta përfaqësojnë Kosovën”.
Haradinaj ka pyetur Kurtin se cila është logjika e tij kur thotë se ShBA-ja nuk mund ta përfaqësojnë Kosovën, kur sipas tij, nuk mbahet mend që Amerika ta ketë kërkuar një gjë të tillë. “Pse nuk i kishte shkuar ndërmend Albin Kurtit të thoshte në vitin 1999 se Amerika nuk mund ta çlirojë Kosovën! Pse ai me çdo kusht kërkon që Amerikën ta bëjë pjesë të problemit kur ajo ishte dhe është pjesë e zgjidhjes. Pse Albin Kurti mundohet ta krijojë përshtypjen se ai mund të jetë viktimë e një ‘komploti ndërkombëtar’! Apo po provon që edhe njëherë ta luajë viktimën, si në vitin 2020!”, shkroi Haradinaj në Facebook.
Sipas tij detyrat dhe obligimet e një kryeministri janë të rënda, aq më tepër siç ka thënë ai, në rastin e Kosovës. “Nëse nuk mund t’u bësh ballë sfidave që t’i nxjerr koha përpara, fajin nuk mund ta kërkosh diku tjetër, pos te vetja! Kosova nuk e ka luksin të bëjë eksperimente duke u armiqësuar me partnerët strategjikë por duhet të shtrohet e të rinisë një fazë tjetër bashkëpunimi. Kjo do të thotë se kryeministri duhet të bëjë kthesë për 180 shkallë sepse është në drejtimin e gabuar! Ky vit nuk mund të vazhdojë me të njëjtat gabime, sepse me këtë kurs është vënë në rrezik edhe vet ekzistenca e shtetit”, ka shkruar Haradinaj, duke shtuar se ai u beson atyre vendeve, që në krye me Amerikën, i janë gjendur vendit në kohë të vështira.
