Serbia vazhdon destruktivitetin e saj karshi Kosovës, duke bërë çmos që të shkaktojë destabilizim me ngritjen e tensioneve me grupet kriminale që i mbështet për të ngritur tash e 19 ditë barrikada në vëri të vendit.
Por për gjithë tensionet e situatën e fundit, politikanë nga kampi opozitar fajtor e përgjegjës e bëjnë Qeverinë e Kosovës dhe drejtuesit e saj, dhe jo Serbinë.
Paraditë ishte deputeti i LDK-së, Avdullah Hoti që mes kritikash e ka “këshilluar” Qeverinë e Kosovës që mos të përmendet lufta e konflikti.
E tani pasdite nënkryetarja e Partisë Demokratike të Kosovës, Vlora Çitaku ka reaguar me një postim në Facebook pas zhvillimeve të fundit në vend, ndërsa theksoi se udhëheqja e shtetit nuk është lojë fëmijësh.
“Betejat të cilave nuk ke dije, guxim dhe vendosmëri me ju shku deri në fund, është më mirë mos me i nisë fare. Amatera të rrezikshëm. Udhëheqja e shtetit nuk është lojë fëmijësh”, shkruan nënkryetarja e PDK-së.
Nga e marta në mbrëmje është mbyllur edhe pika kufitare në Merdar pas bllokadës në territorin e Serbisë. Të bllokuara ndërkohë qysh më herët janë edhe Jarinja e Bërnjaku.
Qeveria ka thënë se po pret që KFOR-i të intervenojë për t’i hequr barrikadat. Kryeministri Albin Kurti ka thënë se heqja e barrikadave është “çështje ditësh”.
Serbët lokalë që 18 ditë kanë ngritur barrikada në veri, në shenjë pakënaqësie me arrestimin e ish-policit serb të Kosovës, Dejan Pantiq.
Institucionet e Kosovës kanë thënë se Pantiq dyshohet për organizimin e sulmit të 6 dhjetorit ndaj zyrtarëve të Komisionit Qendror të Zgjedhjeve në veri.
Që kur janë ngritur barrikadat, në veri të Kosovës janë shënuar një numër i incidentesh me armë zjarri, granata dore dhe shok bomba. Bandat e dirigjuara nga Beogradi kanë sulmuar si policët e Kosovës, në disa raste edhe ato të KFOR-it dhe EULEX-it.
Sulme kanë pësuar edhe gazetarët e mediave të ndryshme që kanë përcjell zhvillimet në veri.
Policia e Kosovës ka shtuar prezencën e saj në veri të Kosovës, duke thënë se synon të garantojë siguri për të gjithë qytetarët.
Autoritetet në Kosovë kanë thënë se “bandat kriminale që mbështeten nga Serbia” qëndrojnë pas barrikadave. Qeveria e Kosovës ka thënë se shteti ka kapacitete që t’i heqë barrikadat, por i ka dhënë kohë misionit të NATO-s në Kosovë, KFOR, që të heqë barrikadat./KosovaNews
