Në disa media kosovare, në mëngjesin e së mërkurës u raportua se deputetja e Kosovës, nga radhët e komunitetit boshnjak Duda Balje, në një intervistë për televizionin boshnjak “Hayat” të martën mbrëma i është referuar Kosovës në një rast si “Kosovë e Metohi”.
E kontaktuar nga KosovaNews lidhur me këtë raportim, deputetja Balje ka thënë se nuk beson që ka thënë një gjë të tillë, por sipas saj edhe nëse e ka thënë ajo i ka “shpëtuar” nga goja.
“Unë mbrëmë kam qenë në një emision që ka zgjatur 40 minuta ku kemi folur për situatën në veri. Unë kam folur vetëm në anën e Kosovës. Nuk besoj që e kam thënë por edhe nëse e kam thënë ka qenë lapsus pra e pa qëllimshme që nuk është e rëndësishme. “, ka thanë Balje për KosovaNews.
Duke u shprehur e sigurt se nuk e iu ka referuar vendit si “Kosovë e Metohi”, Balje ka kërkuar falje edhe nëse e ka thënë një gjë të tillë sipas saj të pa qëllimshme.
“Jam e sigurt që nuk e kam thënë, por edhe nëse e kam thënë, e kam thënë se serbët e quajnë ashtu Kosovën, ose vërtet është shumë pa lidhje. Nëse kam bërë gabim, kërkoj falje por nuk ka qenë e qëllimshme.”, u shpreh Balje për KosovaNews.
