Ministrja e Drejtësisë, Albulena Haxhiu, ka paraqitur pakon e dokumenteve për Zhvillimin e Procesit të Vlerësimit Kalimtar.
Para Komisionit Zhvillimin e Procesit të Vlerësimit Kalimtar, ministrja deklaroi të martën se janë marrë parasysh rekomandimet e Komisionit të Venecias.
Ajo i njoftoi anëtarët e Komisionit me gjithë rrjedhën e procesit që nga prilli i vitit 2021, dhe theksoi se amendamentet kushtetuese për Vettingun janë të harmonizuara me rekomandimet e Venecias dhe janë të gatshme për procedim në Gjykatën Kushtetuese.
“Patëm kërkuar që ta kemi një opinion nga Venecia dhe opinioni i tyre ndonëse nuk e përkrah 100 për qind atë që e ka propozuar Qeveria për një vetting të përgjithshëm, të sistemit të drejtësisë, ne megjithatë kemi marrë për bazë ato vërejtje. Jemi pajtuar me rekomandimet e Komisionit të Venecias dhe e dimë që këto rekomandime nuk janë të obligueshme, ne e kemi bërë këtë, madje në seancën e Komisionit të Venecias ku u diskutua Projektligji për Byronë Kosovare të Konfiskimit të Pasurisë së Pajustifikueshme, morëm fjalë të mëdha nga komisioneri, i cili deklaroi se Kosova është shembull i marrje së rekomandimeve të Komisionit të Venecias”, deklaroi Haxhiu.
Duke qenë një nga proceset më të rëndësishme, në këtë takim ministrja Haxhiu shprehu edhe vullnetin e Ministrisë për ta ndihmuar Komisionin për përmbylljen e kësaj reforme me peshë të madhe për vendin dhe qytetarët.
Ndërsa, deputeti i Partisë Demokratike të Kosovës, Rashit Qalaj, tha se duhet të ketë proces të vettingut edhe për sistemin e sigurisë, ndërsa Haxhiu shtoi se për këtë po merret Ministria e Punëve të Brendshme.
“Është më e lehtë dhe siç e dini, ne e kemi në program edhe vettingun në sistemin e policisë. MPB-ja është duke punuar në këtë drejtim dhe rrethanat në veri ka bërë që mos të dakordohemi më shumë në këtë proces. Është më lehtë sepse nuk ka nevojë për ndryshime Kushtetuese”, tha ajo.
Ministrja e Drejtësisë, e pyetur se a do të sigurohet vota e deputetëve joshumicë për ndryshime kushtetuese, deklaroi se ky proces është sfidues, derisa kërkoi ndihmën e partive opozitare dhe të bashkësisë ndërkombëtare./KosovaNews
