Gazetarja ukrainase, Olga Lisnycha, ka arritur në Kosovë, prej ku do të mund të ushtrojë profesionin e saj nga distanca, pasi është larguar nga shteti i saj që po përballet me pushtimin rus.
Lisnycha është gazetarja e radhës që strehohet në Kosovë në kuadër të projektit “Gazetarët në Rezidencë – Kosovë”.
Gazetarja është mirëpritur në aeroport nga përfaqësues të AGK-së, zyrtarë të MPB-së dhe Policisë së Kosovës.
Gazetarët ukrainas që nga muaji prill i këtij viti, nga programi që është iniciuar nga ECPMF-ja, e që financohet nga Qeveria e Republikës së Kosovës kanë përfituar pagë mujore, kurse të Gjuhës Shqipe dhe Angleze, kurse të integrimit, kanë realizuar vizita në qytetet e Kosovës dhe Shqipërisë.
Ekzekutivi kosovarë fillimisht ka thënë se do të strehojë 20 gazetarë dhe në mars ndau 150,000 euro për strehimin e tyre, ndërsa në ndërkohë janë shtuar mjetet financiare.
Gazetarëve ukrainas që strehohen në Kosovë për një periudhë gjashtëmujore, u mundësohet pagë mujore, akomodim në banesë, kushte për punë, kurse të gjuhës dhe të integrimit, si dhe ndihmë psiko-sociale sipas nevojës.
