Filmi “Emancipation” e rikthen Will Smithin në ekran pas incidentit në ceremoninë, “Oscar”. Aktori ishte i pranishëm në premierën e kësaj drame në Los Angeles, ku u shoqërua nga familja dhe kolegët e tij.
“Të thirresh me emër racist 100 herë në ditë nga aktorë shumë të mirë, ishte mjaft e vështirë. Por, në fakt kjo ishte një përvojë e vështirë për të gjithë. Është sikur t’i rikrijosh ato skena që kanë ndodhur vërtetë. Ne ishim duke xhiruar në lokacionin ku kanë ndodhur gjërat që po provonim t’i sjellim në film. Pra lirisht mund të them se ishin xhirime brutale, moti ishte i keq dhe tema që po e trajtonim ishte e rëndë. Për ta ruajtur energjinë e filmit, të gjithë u desh të ballafaqoheshim me disa situata të vështira. Por shpresa jonë ishte që, duke i shfaqur këto anë të këqija dhe të vrazhda, do të mund t’i edukojmë njerëzit dhe do të jemi në gjendje të krijojmë empati”.
Kolegët e Smithit në film, Charmaine Bingwa dhe Ben Foster, thanë se xhirimi në një plantacion të vërtetë nuk ishin të lehta, por ju vjen mirë që kanë mundësi ta ekranizojnë një histori kaq të rëndësishme.
“Ishte ngarkuese. Nuk ishte përvojë e lehtë sepse kemi xhiruar në një plantacion të vërtetë. Dhe ti mund ta ndieje shpirtin e njerëzve atje. Ishte një ngarkesë e madhe emocionale por mendoj se në raste të tilla, thjeshtë duhet ta gjesh mënyrën e duhur për t’u kujdesur për veten. Më kujtohet që e pranova një mesazh gjatë procesit të xhirimeve dhe menjëherë shpërtheva në lot. Kam qarë për 90 minuta. Por, sado e dhimbshme që ishte, më bëri ta kuptoj se çdo dhimbje që unë po e kaloj, zbehet në krahasim me atë që e përjetuan të gjithë këta njerëz të robëruar. Pra, në ato momente duhet ta kujtojmë arsyen pse jemi duke e bërë këtë punë”, deklaroi Bingwa.
“Epo, gjithçka që duhet të bëni është ta hapni një gazetë dhe ta shikoni burimin e lajmeve. Do të shihni racizëm, antisemitizëm, dhunë sistematike dhe dhunë e një mizorie të paimagjinueshme. Unë vij nga një linjë emigrantësh. Familja ime vjen nga Ukraina dhe Rumania dhe ata marshuan me Martin Luther King. Babai dhe gjyshi im marshuan me Martin Luther King, kështu që unë nuk jam një person haptazi politik, por besoj që nëse mund të ndihmoj dhe të shërbej në të mirë përmes punës sime si aktor, në njëfarë mënyre po e vazhdoj një traditë që mund të ketë një ndikim pozitiv në shoqërinë tonë dhe në mbarë njerëzimin”, përfundoi Foster.
Me regji të Antoine Fuqua, “Emancipation” e sjell Smithin në rolin e një burri të skllavëruar të quajtur Peter, i cili arratiset nga një plantacion në Luiziana. Ky është roli i parë filmik i aktorit nga skandali i muajit mars, kur shakanë e Chris Rockut për gruan e tij, Jada Pinkett Smith, vendosi ta kundërshtojë përmes dhunës.
Në një intervistë të fundit, Smith, tha se e kupton nëse njerëzit nuk janë të gatshëm ta përkrahin filmin e tij të ri, për shkak të veprimit të turpshëm në “Oscars”.
“Emancipation” u lansua në plaftormën digjitale “Apple TV+”, të premten më 9 dhjetor.
