Mëngjesi i 11 dhjetorit e gjeti veriun e Kosovës të qetë, por me rrugë të bllokuara. Megjithatë, gjatë natës është raportuar për sulme mbi patrullat vëzhguese të EULEX-it dhe Policisë së Kosovës.
Policia e Kosovës vazhdon prezencën e shtuar në lagjet e përziera etnikisht, si Mahalla e Boshnjakëve në Mitrovicën e Veriut. KFOR-i dhe EULEX-i janë duke e monitoruar vazhdimisht situatën në veri.
E për sulmet ka reaguar vetë kreu i Qeverisë së Kosovës, Albin Kurti, ndërsa sulmet i kanë dënuar edhe ambasada ShBA-së, Gjermanisë, Italisë si dhe Bashkimi Evropian.
Pas gjithë këtyre reagimeve, edhe Lidhja Demokratike e Kosovës përmes një statusi në Facebook ka thënë se sulmet ndaj institucioneve të Republikës, pjesëtarëve të Policisë së Kosovës dhe të EULEX-it, si dhe barrikadimi dhe mbyllja e rrugëve janë veprime që cenojnë rendin kushtetues të Republikës prandaj si të tilla, sipas tyre, ato janë të papranueshme.
LDK-ja ka thënë se i dënon ashpër këto veprime dhe kërkon që autorët e sulmeve të sillen para institucioneve të drejtësisë së Republikës së Kosovës.
“LDK-ja edhe një herë përsërit kërkesën e saj ndaj Qeverisë dhe institucioneve të tjera të vendit për koordinim të veprimeve me partnerët e Kosovës, si rrugë e vetme drejt kthimit të rendit, sigurisë dhe lëvizjes së lirë në gjithë territorin e Kosovës. Çdo rrugë tjetër është rënie në kurthin e synimeve destabilizuese të Serbisë”, thuhet në reagimin e LDK-së.
LDK-ja thotë se kërkon nga Qeveria e Kosovës plan të qartë për të zgjidhur situatën e sigurisë në veri.
“LDK kërkon nga Qeveria e Kosovës plan të qartë për të zgjidhur situatën e sigurisë në veri. Në këto momente vendit i duhet lidership i vërtetë që do të veprojë me mençuri dhe vendosmëri; që në vend ndarjes e përçarjes siguron unitet të brendshëm e koordinim të ngushtë me aleatët tanë”, thuhet në njoftim.
