Kuvendi i Kosovës, ka filluar punimet me deklarimet jashtë rendit të ditës.
Me të nis seanca mori fjalën deputeti i Lëvizjes Vetëvendosje, Artan Abrashi, i cili u ka bërë thirrje deputetëve të të gjitha partive në Kuvendin e Kosovës që të jenë bashkë për t’i dënuar sulmet në veri të vendit.
Ai tha se nuk duhet të ketë dallime e kundërshtime, duke shtuar se nuk duhet të dorëzohet veriu.
Ai ka shtuar se veprimet e dhunshme po ndodhin pas kërcënimeve të presidentit serb dhe se në veri ekziston ndarja në banda dhe qytetarë.
“Në kohën kur po bëhen përgatitje për zgjedhjet në veri institucionet tona janë përballur me sulme të vazhdueshme. Dje në krye të detyrës është plagosur një polic. Të mërkurën në lagjen e boshnjakëve është raportuar se janë hedhur dy shok bomba. Të gjitha këto akte u bënë pas kërcënimeve të vazhdueshme të presidentit të Serbisë. Në katër komunat në veri nuk është ndarje në serbë dhe shqiptarë por në banda dhe qytetarë. Kriminelëve po ju pengon se ata nuk duan të luftohet krimi e kontrabanda. Por gjërat po ndryshojnë. Kriminelëve po u ngushtohet hapësira, kontrabandistëve po u mbyllen rrugët. Deputetë duhet të jemi të bashkuar për t’i dënuar këto sulme. Nuk duhet të dorëzohet Kosova, nuk duhet të dorëzohet veriu. Kush qëndron fiton. Qëndresa e institucioneve tona tashmë është imperativ i kohës”, ka theksuar ai.
