Policia e Kosovës, gjatë ditës së sotme ka njoftuar se tetëdhjetë (80) zyrtarëve të përfshirë në listën e njoftimit të dorëheqjeve iu është pranuar dorëheqja ndërkaq, kanë mbetur edhe gjithsej 483 zyrtarë policorë që kërkesa e tyre për dorëheqje nuk është miratuar ende.
Burimet KosovaNews-it, kanë konfirmuar se aktualisht Policia e Kosovës është duke i kontaktuar individualisht një nga një secili prej 483 policëve të dorëhequr për t’i pyetur rreth vullnetit të tyre për tu rikthyer në radhët e policisë.
Sipas burimeve. shumë prej tyre janë treguar të gatshëm të rikthehen në punë mirëpo, ndjehen të frikësuar dhe kërcënuar nga strukturat paralele të dirigjuara nga Beogradi.
Për mundësinë e rikthimit, ata kanë kërkuar të rikthehen në punë dhe fillimisht t’iu jepet pushim mjekësor ose pushim vjetor derisa të qetësohet situata e tensionuar.
Nga ana tjetër, policët serbë, kanë afat deri më 8 dhjetor për ta deklaruar përgjigjen e tyre përfundimtare lidhur me rikthimin e tyre në punë. Në të kundërtën, pas skadimit të këtij afati kërkesa e tyre për dorëheqje, do të miratohet.
KosovaNews merr vesh se tetëdhjetë policëve të dorëhequr, iu është kërkuar dorëzimi i uniformave të tyre.
Ndërkohë, Policia e Kosovës, ka bërë të ditur se procesi i pakove të dorëheqjeve për punonjësit e tjerë është duke vazhduar sipas procedurave dhe afateve ligjore në fuqi.