Deputeti i Kuvendit të Kosovës nga radhët e Lëvizjes Vetëvendosje, Salih Zyba ka komentuar të mërkurën kërksat e shtruara në adresë të Qeverisë së Kosovës nga subjektet politike opozitare.
Ai ka thënë se vetëm në Kosovë ndodhë që opozita i bën thirrje Qeverisë që të lëshoj pe e të zmbrapset në raport me një vend armiqësor, siç është Serbia.
“Një opozitë e vërtetë përveç që e kishte mbështetë qeverinë, e kishte kritikuar dhe kërcënuar me protesta nëse lëshon pe. Po del që opozitën e vetme që ka njohur Kuvendi, ka qenë Lëvizja Vetëvendosje që kërkonte më shumë nga Qeveria në raport me Serbinë, jo më pak”, ka shkruar Zyba në rrjetin social, raporton KosovaNews
Partitë opozitare në Kosovë për situatën e tensionuar në veriun e vendit kohën e fundit kanë nisur e kritikojnë qeverinë, duke bërë thirrje në shumë raste që edhe të lëshohet pe dhe mos të shkohet më tutje në tensionim të situatës.
Kritikat e opozitës pasuan pas gjendjes së krijuar në veri ku punonjësit serbë u tërhoqën nga institucionet pasi Qeveria e Kosovës filloi zbatimin shkallë-shkallë të vendimit për konvertimin e targave të makinave, me gjithë thirrjet e nga ndërkombëtarët për një shtyrje prej dhjetë muajsh.
Mosarritja e një marrëveshjeje ndërmjet Kosovës dhe Serbisë në Bruksel lidhur me çështjen e targave, ka bërë që sërish të inkuadrohet ShBA-ja.
Me kërkesën e Shteteve të Bashkuara, kryeministri i Kosovës, Albin Kurti, e ka shtyrë sërish për 48 orë zbatimin e fazës së dytë të vendimit për riregjistrimin e makinave me targa ilegale serbe në RKS – Republika e Kosovës.
Tani për këtë çështje ndodhet në Bruksel zëvendëkryeministri Besnik Bislimi për të negociuar e gjetur një zgjidhje sa më të shpejtë./KosovaNews
